اضطرابات النوم!!

قياسي


ماما : مشاعل خلي دحوم ينام في غرفتك
انا : مامي بنتحر!! كل يوم والثاني يعفسون غرفتي هو وعمير .. مابيهم خل يروحون غرفة ضحى
ضحى: وانا بعد مابيهم خل يروحون غرفتهم الي صايره ديكور!!

الحوار الي دايم دايم وكل يوم يتردد على مسامعي!! .. دحوم اخوي يخاف ينام بغرفته بلحاله!! وهالحاله ذكرتني بنفسي وانا صغيره كنت اعاني من اضطرابات فالنوم, وراح أعترف لكم بـ سرّي الثاني :$ أيام ماكنت بالإبتدائي كنت أنا وأختي في غرفة وحده, وأول ماتنام أختي أبدأ أغمض عيني وألتفت جهة الجدار ومستحيل أفتح عيني حتى لو كنت صاحية!, لأن عندي إعتقاد اني اذا فتحتها وألتفت للجهة الثانيه راح ألقى شبح جالس على كرسي الكمبيوتر ينتظرني!! ولماً أوصل لدرجة الخوف أطلع من الغرفة وأنا مغمضة عينني وأروح لأمي أطق عليها الباب في آخر الليل وأتميرض عندها!!  لدرجة يودوني المستشفى, وكل يوم نفس الحاله يودوني اهلي المستشفى والنتيجه سليمه, لما امي قالت أكيد “عين”!! ههههههههههه, وصدقوني امي ماتدري عن هالكذبه والتمثيل الى اليوم ماقلت لها :$
الشيء الي أبي أوصله كيف أخلي دحوم ينام بغرفته من غير لا يحاتي خوف وظلام وينام نومة هنيه ومرتاحه ويريّحنا معه بدل حوسة الشراشف الي كل يوم يجيبها بغرفتي وغرفة اختي ؟ وكيف اصلا انا قدرت أقاوم الظلام وامسح فكرة الأشباح والوحوش من مخّي !! هذا الي مالقيت له حل -_-


Advertisements

8 responses »

  1. وأنا كنت دياية أكثر منج ، عاد أنا مو شبح ، أنا كنت أتخيل وحوش من الحجم الكبيررر@@

    أتوقع وايد ناس يعانون من هالحالة مع اليهـال ، أحسن شي إتمين مع دحوم فالغرفـة ولما تحسينه بيرقد طلعي ، وشوي شوي ، لين ما توصلون لمرحلة إنه عادي ينام بغرفة مظلمة بس بابها مفتوح وهكذا ، كل شي بالتدريج

    • الله يسامحها عمتي .. كنت لما انام عندها تجلس تقص علينا قصص الاشباح وقصص حقيقيه تقول انها صارت لها في بيتهم القديم .. عشان كذا تشوفيني اموت خوف وانا صغيره :/
      ههههههه ولو تدرين بعد فيه اشياء باقيه من مخلفات الطفوله مثلا الحين لما بجي انزل من السرير يجيني احساس ان يد وحش راح تسحب رجلي وتوديني لعالمهم :S

      دحوم شكله ما منه فايده مع خوفه بس نحاول وان شالله يجيب نتيجه

      مشكوره ياجميله سعيده بوجودك والله ♥

  2. على هالحاله حبيبتي يبيلك تستشيرين مختصـ/ـه بهالمجال
    بإنك تتصلين وتاخذين نصايح وتحلين مشكلت الصغنون الجميل الله يحفظه
    وهالحاله اكيد و بإذن واحد أحد اذا كبر راح تزول ^^
    .
    .
    ميشا ..لو تدري أمكـ بس هههههههه
    بس تدرين يوم كنت صغيره ماذكر اني كنت اخاف الا من شي واحد
    أنه يجي وقت و أفقد أهلي بس << رغم اني افكر يوم كبرت اش جابني وانا بزر عند هالافكار XD
    .
    .
    ههههههه .. للحين ونحنا كبار يجيناا حالة انه من تحت السرير راح تطلع يد وتمسكنا
    وخاصه بعد افلام الرعب اللي مانتوب منها XD

    • ماما تقول انها حاله طبيعيه بس انا اشوف ان خوفه مب طبيعي زايد عن حده!! وان شاءالله يزول هالخوف منه
      وعن التمثيل وانا صغيره الله مالي وجه اقولها بعد السنين هذي خخخخخخ خليها مستوره بس!!
      والصج والله افكارك شينه تخوف 😦 الله يخليهم لك يارب ولايحرمهم منك ♥
      نورتيني يا قميل

  3. ياللللللللله هههههههههههههههه
    تصدقين عندنا هالحاله !!!
    انا كذ اخوي يختي .. عندي غرفع كامله
    وبحمامها بعد .. بس مستحيل ينام فيها !
    على انها بثالث ابئداتي وكبير ..
    بس كذا يخاف ماتعود .. ما ادري ايش !
    والله انه ينام ببفراش بالارض واحيانا ع الاريكه ..
    واحيانا ع السرير ههههههههههه
    مشكله صراحه اطفالنا ..
    احس اذا ما تعود من وهو صغير بيتعب وهو كبير ..

    • لوول
      اخوك مثلي بالضبط اول ماسكننا بيتنا !!
      انفصلت انا واختي وصارت كل وحده بلحالها في غرفه
      وغرفتي ببلكونتها بحمامها ومع كذا مانمت فيها الا بعد سنتين او 3 سنين من سكنتها << نفسيه خخ :S
      كان عندي خوف فضيع والى الان احيانا تمر علي فترات اخاف انام بالظلام مع اني ماارتاح انام الا بالظلام بس الخوف ومايسوي 😐
      ودحوم ابشرك بدأ ينام في غرفته لان امي حطت معه عموري وخلاص حس بالأمان لان في احد معه بالغرفه XD
      سعيده بوجود رهام ❤

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s